સુરત,30 નવેમ્બર : સમગ્ર વિશ્વમાં શ્રીમંત લોકો જન્મદિવસની ઉજવણી ક્લબ, પાર્ટી હોલ, રેસ્ટોરન્ટ અથવા રિસોર્ટમાં કરતા હોય છે પરંતુ, સુરત શહેરના એક સફળ ઉધોગપતિએ તેમની 6 વર્ષની પુત્રીના જન્મદિવસની અનોખી ઉજવણી કરી અનેક ચહેરાઓ પર સ્મિત લહેરાવી સાથે સમાજ સમક્ષ પણ એક ઉત્તમ ઉદાહરણ ઉભું કર્યું.
વાત એમ છે કે, શહેરના ભરથાણા વિસ્તારમાં રહેતા ઉદ્યોગપતિ પીનલ પટેલએ તેમની છ વર્ષીય પુત્રી હિવા પટેલનો જન્મદિવસ નવી સિવિલ હોસ્પિટલના બાળકોના વોર્ડમાં ઉજવ્યો હતો.100 જેટલા બાળકોને રમકડાઓ તેમજ ફળોનું વિતરણ કરી તેમના ચહેરાઓના સ્મિતનું કારણ બની આ 6 વર્ષીય ઢીંગલી. આ સાથે પીનલભાઈએ સિવિલના ટોયઝ રૂમમાં પણ રમકડાઓનું દાન કર્યું હતું. સેવાકીય પ્રવૃતિમાં અગ્રેસર એવા મજુરા મિત્ર મંડળના સભ્યો દિવ્યેશ પટેલ, દેવાંગ પટેલ તેમજ નર્સિગ કાઉન્સિલના ઉપપ્રમુખ ઇકબાલ કડીવાલા પણ આ પ્રસંગે ઉપસ્થિત રહ્યા હતા.

અટલ રાષ્ટ્ર ન્યુઝ // ભાવેશ ત્રિવેદી // સુરત