સુરત,19 માર્ચ : સુરત જિલ્લા સંકલન અને ફરિયાદ સમિતિની બેઠક નિવાસી અધિક કલેકટર વાય.બી. ઝાલાના અધ્યક્ષસ્થાને જિલ્લા કલેકટર કચેરીના સભાખંડ ખાતે યોજાઈ હતી.બેઠકમાં નિવાસી અધિક કલેકટરએ જનપ્રતિનિધિશ્રીઓ દ્વારા રજુ કરવામાં આવેલા પ્રશ્નોનું સમયમર્યાદામાં નિરાકરણ આવે તે દિશામાં જે-તે વિભાગના અધિકારીઓને કાર્યવાહી કરવા જણાવ્યું હતું.

ધારાસભ્ય વી.ડી.ઝાલાવાડિયાએ કામરેજ ચાર રસ્તા આસપાસ તેમજ કામરેજ તાલુકા પંચાયત પાસેના સર્વિસ રોડ પરના દબાણો દૂર કરી ટ્રાફિકના પ્રશ્નનો નિવેડો લાવવાની રજૂઆત કરી હતી. તેમણે શ્યામધામ મંદિરથી કામરેજ ચાર રસ્તા સુધીના જાહેરમાર્ગ પર વાહનો લઈ ધંધો કરનારાઓના દબાણો દૂર કરવા ઉપરાંત કામરેજ મામલતદાર કચેરીથી કામરેજ ચાર રસ્તા અને કામરેજ ચાર રસ્તાથી અજીમ હોસ્પિટલ સર્વિસ રોડ પરના ડીવાઈડર પરના દબાણો દુર કરવાની રજુઆત કરી હતી. આ સમસ્યાનું નિરાકરણ કરવા નિવાસી અધિક કલેકટરએ સંબંધિત વિભાગને આદેશ આપ્યો હતો.
ધારાસભ્ય ઈશ્વર પરમારે બારડોલી તાલુકાના નિયત ગામોમાં ગુજરાત ગેસ કંપનીની પાઈપલાઈન અંતર્ગત ગ્રામપંચાયતો અને એજન્સીઓ વચ્ચે રિસ્ટોરેશન ચાર્જ અને વાર્ષિક ભાડા અંગેના પેન્ડીંગ પ્રશ્નને રાજ્ય સરકારના પંચાયત અને ગ્રામ વિકાસ વિભાગના નિયત ઠરાવને અનુસરીને તાકીદે નિવારણ કરવાની રજૂઆત કરી હતી.
ધારાસભ્ય વિવેકભાઈ પટેલે ઉધના ઝોન ઓફિસથી નવજીવન શોરૂમ તરફના રસ્તામાં રેવાનગર ઇન્ડસ્ટ્રીઅલ ગેટ પાસે, દેવચંદનગર ઇન્ડસ્ટ્રીઅલના ગેટ 1 અને 2 પાસે, અને પંચશીલનગર જતાં દેવચંદનગરના ગેટ 3 પાસે જનતાને નડતરરૂપ વિજ ટ્રાન્સફોર્મરો ખસેડવા તથા સોનલ શાકમાર્કેટથી ગોવાલક સબ સ્ટેશન-ઉધના રોડ પર બંને બાજુની ઓવરહેડ હાઈટેન્શન લાઈનો અન્ડરગ્રાઉન્ડ કરવાની રજૂઆત કરી હતી. જે અંગે નિવાસી અધિક કલેકટરએ જે તે અધિકારીને સંકલન કરી કાર્યવાહી કરવાની સૂચના આપી હતી.
ધારાસભ્ય સંગીતા પાટિલે રજૂઆત કરતા જણાવ્યું હતું કે, લિંબાયત વિસ્તારમાં કેટલાક લોકો દ્વારા અશાંતધારાનું ઉલ્લંઘન કરવામાં આવે છે તેવી રજુઆત કરીને અશાંતધારાનું કડકપણે પાલન કરાવવાની રજુઆત કરી હતી.આ બેઠકમાં ધારાસભ્ય ઝંખના પટેલ, સુડાના સી.ઈ.ઓ. વી.એન.શાહ, જિલ્લા ગ્રામ વિકાસ એજન્સીના નિયામક એમ.બી. પ્રજાપતિ, ડી.સી.પી. સરોજકુમારી તથા સંબંધિત વિભાગના ઉચ્ચ અધિકારીઓ ઉપસ્થિત રહ્યા હતા.

અટલ રાષ્ટ્ર ન્યૂઝ // ભાવેશ ત્રિવેદી // સુરત