સુરત, 26 માર્ચ : આરોગ્ય ક્ષેત્રે નવા-નવા આયામ સર કરી રહેલા કિરણ હોસ્પિટલે વધુ એક આવકારદાયક પગલું ભર્યું છે. આવતીકાલ તા.27મીએ સવારે 9 વાગે ઓલપાડ તાલુકાના વડોદ ખાતે ઉત્તરપ્રદેશના રાજ્યપાલ આનંદીબહેન પટેલ અને રાજ્યના મુખ્યમંત્રી ભૂપેન્દ્ર પટેલના વરદ્દહસ્તે કિરણ મેડિકલ કોલેજનું ભૂમિપૂજન સંપન્ન થશે. ત્યારબાદ તેઓ વરિયાવના ડી.ડી.સ્પોર્ટ્સ કોમ્પલેક્ષ ખાતે આયોજીત ભૂમિપૂજનના જાહેર કાર્યક્રમના સ્થળે ઉપસ્થિત રહેશે.
સ્વસ્થ સમાજના નિર્માણ હેતુ સાથે કાર્યરત સમસ્ત પાટીદાર આરોગ્ય ટ્રસ્ટ સંચાલિત કિરણ હોસ્પિટલ દ્વારા આઉટર રિંગરોડથી 2 કિ.મી.ના અંતરે વડોદ ગામ ખાતે અતિ આધુનિક સુવિધા તેમજ મોર્ડન ટેક્નોલોજીથી સુસજ્જ 65000 વારના વિશાલ કેમ્પસમાં 150 સીટો સાથેની મેડિકલ કોલેજનો પ્રારંભ થવા જઈ રહ્યો છે. જ્યાં એમબીબીએસ, પીજી સહીત અન્ય કોર્ષ સાથે 1000 ડોકટરો માટેની જરૂરી તમામ સુવિધાઓ ઉપલબ્ધ થશે. કેમ્પસનું ભૂમિદાન કિરણ જેમ્સના માલિક વલ્લભ લખાણી પરિવાર તરફથી મળ્યું છે.
આ પ્રસંગે કેન્દ્રીય આરોગ્ય મંત્રી મનસુખ માંડવીયા, શિક્ષણ મંત્રી જીતુ વાઘાણી, કેન્દ્રીય રેલવે અને ટેક્ષટાઈલ રાજ્યમંત્રી દર્શના જરદોશ, આરોગ્ય મંત્રી ઋષિકેશ પટેલ, માર્ગ અને મકાન મંત્રી પૂર્ણેશ મોદી, ગૃહ રાજ્યમંત્રી હર્ષ સંઘવી, શહેરી વિકાસ રાજ્યમંત્રી વિનુ મોરડિયા, કૃષિ અને ઊર્જા રાજ્ય મંત્રી મુકેશ પટેલ, સાંસદ સી.આર.પાટીલ, સાંસદ પ્રભુ વસાવા, મેયર હેમાલી બોઘાવાલા અને VNSGU ના કુલપતિ કે.એન.ચાવડા તથા અન્ય અગ્રણીઓ મહાનુભાવો ઉપસ્થિત રહેશે.

અટલ રાષ્ટ્ર ન્યુઝ // ભાવેશ ત્રિવેદી // સુરત