સુરત, 29 માર્ચ : સુરત વેડ વિસ્તારમાંથી એક પરીણિતાનો 181 મહિલા હેલ્પલાઈનમાં કોલ આવ્યો કે મારી બે માસની દિકરીને ઝૂંટવી લઈ સાસરિયાઓએ ઘર બહાર કાઢી મૂકી છે, જેથી મદદરૂપ બનવા અપીલ કરતા ઉમરાની અભયમ મહિલા રેસ્ક્યુ ટીમ દર્શાવેલા સ્થળ પર પહોંચી હતી. ટીમે સાસરી પક્ષના સભ્યોનું સમજાવટ સાથે અસરકારક કાઉન્સેલિંગ કરતા તેઓએ બાળકી સહિત પરીણિતાને ફરીથી અપનાવી લીધી હતી.વિગતો એવી છે કે, મૂળ બિહારનો એક પરિવાર રોજગારી અર્થે સુરત આવીને સ્થાયી થયો છે. આ પરિવારની પુત્રવધૂ સીમા (નામ બદલ્યું છે)ને દિકરીનો જન્મ થતાં સાસરીવાળાને ગમ્યું ન હતું. દીકરી જન્મ પસંદ ન હોવાથી માતાની સારસંભાળ પણ લેતા ન હતા, અને નાની નાની વાતોમાં મહેણાંટોણા સંભળાવી માનસિક રીતે પરેશાન કરતાં હતાં.
ગત રોજ સાસુએ બળજબરીપુર્વક નાની બાળકીને ઝૂંટવી લઇ સીમાને ધક્કો મારી ઘરમાંથી કાઢી મૂકતા દુઃખી પરિણિતાએ 181 મહિલા હેલ્પલાઈનમાં કોલ કરી મદદ માંગી હતી. અભયમ ટીમે સ્થળ પર પહોંચીને સાસરીવાળાને સમજાવ્યું કે પુત્રવધુને ત્રાસ આપવો એ કાયદાકીય અને સામાજિક અપરાધ છે, જેના માટે જેલની સજા પણ થઈ શકે છે. પરિવારમાં સૌ અનુકૂળ થઇ પરસ્પર ગરિમા સાચવવાની અને દીકરો-દીકરી એક સમાન છે એવી સમજ આપી હતી. દીકરીઓ પણ પુત્ર સમોવડી બની અનેક ક્ષેત્રોમાં આગળ વધી રહી છે. જેથી દરેક સભ્યએ પોતાની ભુલ કબૂલી હતી, તેમજ બાળકી અને પુત્રવધૂને કાળજી સાથે સારસંભાળ રાખશે તેવી ખાતરી આપી હતી.આમ, એક પરિવારિક ઝઘડાંનું સુખદ સમાધાન કરાવવામાં અભયમ ટીમને સફળતા મળી હતી.

અટલ રાષ્ટ્ર ન્યુઝ // ભાવેશ ત્રિવેદી // સુરત